- Utan innsats frå frivillige klarer vi aldri å løysa problema knytt til biomangfaldet. Det finst ingen superglupe politikarar - slik som meg - på toppen som kan alt og skjønar alt, sa miljø- og utviklingsminister Erik Solheim då han vitja Naturhistorisk museum for å dela ut SABIMA sin biomangfaldspris til sommarfuglentusiasten Jan-Erik Carlsson frå Halden.
- Utan din innsats ville Miljøverndepartementet aldri ha sett i verk dei tiltaka som vi no håpar skal sikra klippeblåvengjen, heldt han fram.
- Ikkje flaut å verna
Carlsson varsla i 2006 SABIMA om at det var utarbeidd utbyggjingsplanar i Torpbukta i Halden. Dette er det siste kjende leveområdet i Norge for sommarfuglen klippeblåvengje. Dette sette i gang ein prosess som altså endte opp med at Halden kommune fekk pålegg frå departementet om å leggja om planane.
Jan-Erik Carlsson viser fram prisen, eit måleri som kunstaren Jan Petter Bratsberg har laga av den truga sommarfuglen. Foto: Ola Sæther, Uniforum
- Eg vil gjerne senda ein beskjed til norske kommunar, politikarar og administratorar, sa Carlsson då han fekk overrekt prisen:
- Det er ikkje flaut å verna artar!
- Utbyggjingar kan flyttast
- La det vera dagens motto, istemte Solheim.
- Det er viktigare å verna ein art enn å få til ei utbyggjing nett der det var planlagt. Utbyggjingar kan ein alltid leggja til andre stader.
Utdelinga skjedde i samband med markeringa av FNs internasjonale biomangfaldsdag og Den internasjonale plantebevaringsdagen ved NHM.
Sjå òg:
Reddet truet sommerfugl (Uniforum, 19. mai 2009)