- Så vidt eg kjenner til, er det fyrste gongen i Systematisk hage sin historie at vi ikkje har planta ut eittårige plantar, seier professor Brita Stedje.
- Det fører til reduserte opplevingar og redusert læringsutbyte for dei besøkjande, og det beklagar vi sjølvsagt sterkt.
Kontrollbestemma
Det er mangelen på botanikarar som har ført til denne avgjerda.
- Problemet med å ikkje ha ein ansvarleg botanikar er at det ikkje er nokon som kan gå gjennom samlinga som Systematisk hage er. Ingen som kan kontrollbestemma, sjekka nomenklatur, ha ansvar for kva som skal plantast ut av nytt og laga nye etikettar om det trengst.
I år vert dette bedet ståande tomt.
- Egentlig er det tre botanikarar knytt til Botanisk hage. Men sjølv fungerer eg som seksjonssjef for Botanisk hage i påvente av at det vert tilsett nokon i den stillinga, dei to andre har òg andre arbeidsoppgåver for tida, og det er ikkje midlar til å setja inn vikarar, forklarar Stedje.
Fagleg kvalitet
Mange av dei besøkjande i Botanisk hage tenkjer kanskje ikkje over at hagen fyrst og fremst er ei vitskapleg samling av levande plantar.
- Derfor er det så viktig at den faglege kvaliteten er god nok, seier Stedje.
Ho understrekar at dei fleirårige plantane vert ståande, og at desse har vore sjekka av botanikar i fjor.